WANITA HAIDH / HAIDL HARAM SHALAT

Istri Haidl Haram Sholat, Shaum, kalih Thowaf

158 - وَعَنْ أَبِي سَعِيدٍ - رضي الله عنه - قَالَ: قَالَ رَسُولُ اللَّهِ - صلى الله عليه وسلم: «أَلَيْسَ إِذَا حَاضَتْ لَمْ تُصَلِّ وَلَمْ تَصُمْ?». مُتَّفَقٌ عَلَيْهِ فِي حَدِيثٍ.

158 – Ti Abu Sa’id rodiyallohu ‘anhu anjeuna sasanggem: Rosululloh shollallohu ‘alaihi wa sallam ngandika, “Sanesna nalika haidl istri henteu sholat kalih henteu shaum?”. Hr. Muttafaq ‘Alaihi dina hadits anu panjang.

Matan al-Hadits

عَنْ أَبِي سَعِيدٍ الْخُدْرِيِّ قَالَ خَرَجَ رَسُولُ اللهِ صلى الله عليه وسلم فِي أَضْحًى أَوْ فِطْرٍ إِلَى الْمُصَلَّى فَمَرَّ عَلَى النِّسَاءِ فَقَالَ يَا مَعْشَرَ النِّسَاءِ تَصَدَّقْنَ فَإِنِّي أُرِيتُكُنَّ أَكْثَرَ أَهْلِ النَّارِ فَقُلْنَ وَبِمَ يَا رَسُولَ اللهِ قَالَ تُكْثِرْنَ اللَّعْنَ وَتَكْفُرْنَ الْعَشِيرَ مَا رَأَيْتُ مِنْ نَاقِصَاتِ عَقْلٍ وَدِينٍ أَذْهَبَ لِلُبِّ الرَّجُلِ الْحَازِمِ مِنْ إِحْدَاكُنَّ قُلْنَ وَمَا نُقْصَانُ دِينِنَا وَعَقْلِنَا يَا رَسُولَ اللهِ قَالَ أَلَيْسَ شَهَادَةُ الْمَرْأَةِ مِثْلَ نِصْفِ شَهَادَةِ الرَّجُلِ قُلْنَ بَلَى قَالَ فَذَلِكَ مِنْ نُقْصَانِ عَقْلِهَا أَلَيْسَ إِذَا حَاضَتْ لَمْ تُصَلِّ وَلَمْ تَصُمْ قُلْنَ بَلَى قَالَ فَذَلِكَ مِنْ نُقْصَانِ دِينِهَا.

Ti Abi Sa’id al-Khudri rodiyallohu ‘anhu anjeuna sasanggem: Rosululloh shollallohu ‘alaihi wa sallam kaluar dina dintenan Adha atanapi Fithri ka musholla, istri-istri ngalalangkung lajeng Nabi ngandika, “He kaom istri! Prak aranjeun shodaqoh, alatan satemena ditinggalikeun ka kaula kalolobaan pangeusi naraka teh aranjeun”. Istri aya anu naroskeun: “Nun Rosululloh, alatan naon?”, pangandika Nabi: “Loba ngala’nat jeung kufur kana kahadean (salaki), kaula henteu ninggali anu leuwih kurang akal jeung agamana anu ngamalengoskeun hate hiji lalaki anu panceg pamadegan tibatan aranjeun kaom istri.” Aranjeuna tumaros: “Nun Rosululloh, naon maksadna kurangna agama jeung akal abdi sadaya?”, pangandika Nabi: “Sanesna kasaksian saurang istri saumpama satengah kasaksian saurang pameget?”, abdi sadaya ngawaler: “Sumuhun”, pangandika Nabi, “Mangka eta kakurangan akalna teh.” “Sanesna nalika istri haidl anjeuna henteu sholat kalih henteu shaum?”, abdi sadaya ngawaler: “Sumuhun”, pangandika Nabi, “Mangka eta kakurangan agamana teh”. Hr. Al-Bukhori, Shohih Al-Bukhori, no. 304.

159 - وَعَنْ عَائِشَةَ - رَضِيَ اللَّهُ عَنْهَا - قَالَتْ: لَمَّا جِئْنَا سَرِفَ حِضْتُ, فَقَالَ النَّبِيُّ - صلى الله عليه وسلم: «اِفْعَلِي مَا يَفْعَلُ الْحَاجُّ, غَيْرَ أَنْ لَا تَطُوفِي بِالْبَيْتِ حَتَّى تَطْهُرِي». مُتَّفَقٌ عَلَيْهِ فِي حَدِيثٍ.

159 – Ti ‘Aisyah rodiyallohu ‘anha anjeuna sasanggem: Nalika abdi sadaya dugi ka Sarif (hiji tempat antawis Mekah jeung Madinah), sim kuring haidl, Nabi shollallohu ‘alaihi wa sallam ngandika, “Prak pidamel amalan anu dipidamel hajji kajaba anjeun ulah thowaf di Baitulloh dugikeun ka anjeun susuci.” Hr. Muttafaq ‘Alaihi dina hadits anu panjang.

Matan al-Hadits

عَنْ عَائِشَةَ ، قَالَتْ : خَرَجْنَا مَعَ النَّبِيِّ صلى الله عليه وسلم : لاَ نَذْكُرُ إِلاَّ الْحَجَّ فَلَمَّا جِئْنَا سَرِفَ طَمِثْتُ فَدَخَلَ عَلَيَّ النَّبِيُّ صلى الله عليه وسلم وَأَنَا أَبْكِي فَقَالَ مَا يُبْكِيكِ قُلْتُ لَوَدِدْتُ وَاللَّهِ أَنِّي لَمْ أَحُجَّ الْعَامَ قَالَ لَعَلَّكِ نُفِسْتِ قُلْتُ نَعَمْ قَالَ فَإِنَّ ذَلِكَ شَيْءٌ كَتَبَهُ اللَّهُ عَلَى بَنَاتِ آدَمَ فَافْعَلِي مَا يَفْعَلُ الْحَاجُّ غَيْرَ أَنْ لاَ تَطُوفِي بِالْبَيْتِ حَتَّى تَطْهُرِي.

Ti ‘Aisyah rodiyallohu ‘anha anjeuna nguningakeun: Abdi sadaya kaluar marengan Nabi shollallohu ‘alaihi wa sallam, henteu aya anu janten emutan anging maksad hajji. Nalika dugi ka Sarif, sim kuring haidl. Nabi shollallohu ‘alaihi wa sallam nepangan nalika sim kuring nuju nangis, Nabi mariksa: “Naon anu ngalantarankeun anjeun nangis?” waler sim kuring: “Sim kuring bener-bener hanjelu, demi Alloh, taun ieu teu tiasa ibadah hajji.” Nabi tumaros: “Panginten anjeun nuju haidl?”, waler sim kuring: “Sumuhun”. Pangandika Nabi, “Saenyana perkara eta katetepan Alloh ka barudak-barudak istri Adam, mangka prak pidamel manasik hajji kajaba anjeun ulah thowaf di Baitulloh dugikeun ka anjeun susuci”. Hr. Muslim, no. 294.

160 - وَعَنْ مُعَاذٍ - رضي الله عنه - أَنَّهُ سَأَلَ النَّبِيَّ - صلى الله عليه وسلم: مَا يَحِلُّ لِلرَّجُلِ مِنِ اِمْرَأَتِهِ, وَهِيَ حَائِضٌ؟ قَالَ: «مَا فَوْقَ الْإِزَارِ». رَوَاهُ أَبُو دَاوُدَ وَضَعَّفَهُ.

160 – Ti Mu’adz rodiyallohu ‘anhu satemena anjeuna tumaros ka Nabi shollallohu ‘alaihi wa sallam, “Perkara naon anu dihalalkeun pikeun pameget ka garwana nalika nuju haidl?”, pangadika Nabi: “Perkara luhureun kaen”. Hr. Abu Daud kalih anjeuna nga-DLOIF-keun.

161 - وَعَنْ أُمِّ سَلَمَةَ رَضِيَ اللَّهُ عَنْهَا قَالَتْ: كَانَتِ النُّفَسَاءُ تَقْعُدُ فِي عَهْدِ رَسُولِ اللَّهِ - صلى الله عليه وسلم - بَعْدَ نِفَاسِهَا أَرْبَعِينَ. رَوَاهُ الْخَمْسَةُ إِلَّا النَّسَائِيَّ, وَاللَّفْظُ لِأَبِي دَاوُدَ.

161 – Ti Ummu Salamah rodiyallohu ‘anha anjeuna nguningakeun: Kabuktosan anu nifas ngantunkeun sholat di jaman Rosululloh shollallohu ‘alaihi wa sallam 40 dinten ti sa-prak kaluar nifasna. Hr. Al-Khomsah kajaba An-Nasai, sarta lafadz kagungan Abu Dawud.

Syarah al-Hadits

عَنْ عَبْدِ اللهِ بْنِ عَمْرٍو قَالَ قَالَ رَسُولُ اللهِ صَلَّى اللَّهُ عَلَيْهِ وَسَلَّمَ: تَنْتَظِرُ النُّفَسَاءُ أَرْبَعِينَ لَيْلَةً، فَمَنْ رَأَتِ الطُّهْرَ قَبْلَ ذَلِكَ فَهِيَ طَاهِرٌ

Ti ‘Abdulloh bin ‘Amr rodiyallohu ‘anhu anjeuna sasanggem: Rosululloh shollallohu ‘alaihi wa sallam ngandika, “Istri-istri anu nifas ngantos (henteu sholat) salami 40 dinten, mangka sing saha anu ninggali bersih (saat) sateuacan eta (40 dinten) mangka anjeuna parantos suci (wajib susuci).” Hr. Al-Hakim: Al-Mustadrok.

162 - وَفِي لَفْظٍ لَهُ: وَلَمْ يَأْمُرْهَا النَّبِيُّ - صلى الله عليه وسلم - بِقَضَاءِ صَلَاةِ النِّفَاسِ. وَصَحَّحَهُ الْحَاكِمُ.

162 – Sarta dina riwayat anjeuna (Abu Dawud): Sarta Nabi shollallohu ‘alaihi wa sallam henteu marentahkeun aranjeuna nga-qodlo sholat alatan nifas-na. Ieu hadist dishohihkeun ku Al-Hakim.